تعمیراتی صنعت اور تاجروں نے جمعہ کو لوہے کی مصنوعات کی قیمتوں میں کمی کے حکومتی اقدامات پر اظہار تشکر کیا۔
تفصیلات کے مطابق شہر کی مارکیٹوں میں لوہے کی مصنوعات کی قیمتوں میں 5 ہزار سے 10 ہزار روپے فی ٹن تک کمی ریکارڈ کی گئی۔ 

اس کے علاوہ 260,000 روپے فی ٹن فروخت ہونے والی برانڈڈ راڈ کی قیمت میں 10,000 روپے کی کمی واقع ہوئی ہے۔ لوہے کی سستی قیمت پر تاجر برادری اور تعمیراتی صنعت سے وابستہ صارفین نے خوشی کا اظہار کیا۔ پاکستان آئرن اینڈ اسٹیل مرچنٹس ایسوسی ایشن کے ذرائع نے میڈیا کو بتایا کہ لوہے کی قیمتوں میں کمی تعمیراتی شعبے کے لیے ایک بڑی ترغیب ہے، ان کا کہنا تھا کہ ملک میں اربوں روپے کے منصوبے شروع ہوچکے ہیں، جس سے اربوں مالیت کی معاشی سرگرمیاں ہوں گی اور لاکھوں نئے کاروبار پیدا ہوں گے۔

لاہور چیمبر آف کامرس اینڈ انڈسٹری (ایل سی سی آئی) کے صدر کاشف انور نے لوہے کی قیمتوں میں کمی پر خوشی کا اظہار کرتے ہوئے کہا کہ پاکستان میں تعمیراتی صنعت ایسے منصوبوں کی ایک وسیع رینج پر محیط ہے جو انفراسٹرکچر کی ترقی کے ذریعے روزگار اور ترقی کے بے شمار مواقع فراہم کرتے ہیں۔ انہوں نے کہا کہ لوہے کی قیمتوں میں کمی سے ہاؤسنگ پراجیکٹس کی لاگت میں کمی آئے گی، چین پاکستان اقتصادی راہداری (سی پی ای سی) سے ملک میں تکنیکی ترقی میں اضافہ ہوگا اور ہنر مند لیبر کی مانگ میں کئی گنا اضافہ ہوگا۔